ГИРДИҲАМОИИ МУХОЛИФИНИ ҲУКУМАТИ ҚИРҒИЗИСТОН ДАР БИШКЕК

                      Бишкек, 28 март (АМИТ «Ховар» — Са — Нюс). — Дирӯз дар пойтахти Қирғизистон — шаҳри Бишкек гирдиҳамоии тарафдорони Ҷунбиши муттаҳидаи миллӣ баргузор гардид. Намоишгарон ба президент ва ҳукумати мамлакат шаш талаби худро пешниҳод намуданд. Онҳо, аз ҷумла, талаб карданд, ки 50 фоизи аъзои комиссияҳои интихобот аз ҷумлаи намояндагони мухолифин таъин карда шаванд, 50 фоизи намояндагони мухолифин ба мақомоти қудратӣ ва интизомӣ шомил карда шаванд, дар мамлакат интихоботи шаффоф гузаронида, таъқиботи сиёсии мухолифин қатъ карда шавад ва ғайра. Барои иҷрои талаботи мазкур ба президенти кишвар Қ.Боқиев то 20 апрел мӯҳлат дода шуд.                      Вазири собиқи мудофиаи Қирғизистон Исмоил Исҳоқов изҳор намуд, ки агар мақомоти мамлакат талаботи мухолифинро то 20 апрел иҷро накунанд, гирдиҳамоии бемӯҳлат ташкил карда хоҳад шуд. Вай қайд кард, ки рӯйхати талаботи мухолифин баъди анҷоми гирдиҳамоӣ ба президенти ҷумҳурӣ фиристода шуд.