ХАТИ ИНТИҚОЛИ БАРҚИ «ҶАНУБ – ШИМОЛ» 20 МОҲ ПЕШ АЗ МӮҲЛАТ

                   Душанбе, 18 март. (АМИТ «Ховар», Кристина Эрлих). — Сохтмони хати интиқоли барқи баландшиддати «Ҷануб — Шимол», ки дарозии он 264 километр мебошад, моҳи октябри соли равон ба истифода дода мешавад. Тибқи нақша хати интиқоли барқи мазкур мебоист дар давоми 45 моҳ сохта мешуд, вале ба туфайли босуръат давом додани корҳо хати интиқоли барқ 20 моҳ пеш аз мӯҳлати муқарраршуда ба истифода хоҳад шуд. Ҳоло дар ин ҷо 600 коргар кор мекунад. Ба туфайли фаъолияти хати интиқоли барқи «Ҷануб — Шимол» аҳолии мамлакат тамоми фаслҳои сол бо қувваи барқ пурра таъмин карда хоҳад шуд.                  Хати интиқоли барқи мазкур аз ҳудуди 9 ноҳия, аз ҷумла, Турсунзода, Шаҳринав, Ҳисор, Рӯдакӣ, Варзоб, Айнӣ, Шаҳристон, Истаравшан ва Ғончӣ мегузарад. Барои сохтмони он 281 миллиону 283 ҳазору 633 доллари ИМА ҷудо карда шудааст.