ИХТИРОЪКОРОНИ БЕҲТАРИНИ ВИЛОЯТ ҚАДРДОНӢ ШУДАНД

                      Душанбе, 16 март. (АМИТ «Ховар», Бекназари Абӯбакр). — Дар маркази вилояти Суғд — шаҳри Хуҷанд озмуни вилоятии «Беҳтарин ихтирооти сол» ҷамъбаст гардид. Озмуни мазкур тибқи қарори раиси вилоят аз 25 феврали соли 2008 баҳри рушду инкишофи иқтисоди миллӣ, пешравии илму техника, ҳавасманд намудани ташаббускориву фаъолиятнокии ихтироъкорӣ ва такмили муносибатҳои истеҳсолӣ эълон гардида буд.                       Аз маркази иттилоот ва таҳлили дастгоҳи раиси вилояти Суғд ба мухбири АМИТ «Ховар» иттилоъ доданд, ки аз рӯи натиҷаи ҷамъбасти озмун ҷои аввал ба профессори Донишкадаи кўҳӣ-металлургии Тоҷикистон Рустам Азизов барои ихтирои «Тарзи мураккаби ҳосил намудани қабати газию ҳароратӣ аз маводҳои композитсионӣ ба воситаи бориккунонии диффузиявию ҳароратӣ» дода шуда, бо дипломи дараҷаи якум ва бо маблағи 2500 сомонӣ мукофотпулӣ сарфароз гардид.                        Ҷои дуюм ба дотсенти Донишгоҳи давлатии Хуҷанд ба номи академик Б.Ғафуров Абдулаҳад Қодиров барои ихтирои «Усули истеҳсоли сарпӯшҳои шаффоф аз оксиди кремний» ва «Генератори фотоэлектрии гидрогении бо сӯзишворӣ коркунанда дар заминаи батареяи кремнийдори офтобӣ» сазовор дониста шуда, бо дипломи дараҷаи дуюм ва 1500 сомонӣ мукофотпулӣ сарфароз гардонида шуд. Ҷои сеюмро сармуҳандиси НБО-и «Дӯстии халқҳо»-и шаҳри Қайроққум Сӯҳроб Мамадҷонов барои ихтирои «Кашидани об аз болопӯши турбинаҳои сифони нерӯгоҳи обанбори Қайроққум» ишғол намуда, бо дипломи дараҷаи сеюм ва маблағи 1000 сомонӣ мукофотпулӣ сарфароз гардонида шуд.                      Дар фарҷоми ҷамъомад ихтироъкорони вилоят пешниҳод намуданд, ки минбаъд озмуни мазкур ба номи яке аз шахсони барӯманди халқи тоҷик номгузорӣ карда шавад.