ИМА БА ТОҶИКИСТОН БЕШТАР КӮМАК МЕРАСОНАД

                   Душанбе, 20 март. (АМИТ «Ховар», Покиза Маҳмадбекова). — Дар давоми моҳҳои январу феврали соли равон ба Тоҷикистон ба маблағи 16 миллиону 550 ҳазор доллари ИМА кӯмаки башардӯстона расонда шуд. Ин кӯмакро 26 мамлакати хориҷӣ расонд. Мувофиқи маълумоти Кумитаи давлатии омор, дар ин давра ба ҷумҳурӣ ба маблағи 885 ҳазор доллар орд, ба маблағи як миллион доллар равғани наботӣ ва ба маблағи қариб 8 миллион доллар дору ворид карда шуд. Мухбири АМИТ «Ховар» зикр менамояд, ки дар байни мамлакатҳои мададгори Тоҷикистон Иёлоти Муттаҳида мақоми аввалро ишғол менамояд. Дар ин бобат Латвия дар ҷои дуюм ва Олмон дар ҷои сеюм қарор доранд.