ИМКОНИЯТҲОИ ИҶРОИШИ АНДОЗ БЕШТАРАНД

                   Хоруғ, 6 март. (АМИТ «Ховар», Лутфишо Додо, Пайрав Назаров).- Дар ҳузури раиси ВМКБ Қодири Қосим оид ба ҳолати ҷамъ овардани андоз, роҳҳои бартараф намудани камбудиҳо ва пешгирии бӯҳрони молиявӣ ҷаласа баргузор гардид.                    Дар ҷаласа ҳисоботи Хадамоти андози навоҳии Роштқалъа, Рӯшон, Шуғнон, шаҳри Хоруғ, раёсатҳои молия ва андози вилоят шунида шуд. Дар он зикр гардид, ки соли 2008 ва ибтидои соли 2009 нақшаи қисми даромади бӯҷа барзиёд иҷро шуда бошад, ҳам аммо ҳанӯз на аз ҳамаи имконоти ғанигардонии бӯҷаи маҳаллӣ аз ҳисоби андозбандӣ ва ҷамъ овардани он истифода бурда мешавад. Чунончи, теъдоди соҳибкорони инфиродиро дар мақомоти андоз 2800 нафар арзёбӣ мекунанд. Дар асл ин рақам бояд бештар бошад. Чунин ҳолат дар ҷамъоварии андоз аз воситаҳои нақлиёт низ ба мушоҳида мерасад.