ИШТИРОКИ Ҳ. ЗАРИФИ ДАР МУЛОҚОТИ СЕҶОНИБА

                    Душанбе, 25 март. (АМИТ «Ховар», Наргис Бойаҳмадова). — Вазири корҳои хориҷии Ҷумҳурии Тоҷикистон Ҳамрохон Зарифӣ дар мулоқоти сеҷонибаи вазирони корҳои хориҷии Ҷумҳурии Тоҷикистон, Ҷумҳурии Исломии Афғонистан ва Ҷумҳурии Исломии Эрон, ки 20 марти соли ҷорӣ дар шаҳри Мазори Шариф баргузор гардид, иштирок намуд.                    Ҳамрохон Зарифӣ бо ҳамроҳӣ , вазири корҳои хориҷии Афғонистон Рангин Додфар Спанто ва вазири корҳои хориҷии Эрон Манучеҳр Муттакӣ зимни мулоқот доираи васеи масъалаҳои ҳамкориро дар соҳаҳои сиёсат, амният, иқтисодӣ, фарҳанг, таҳсилоти олӣ, тандурустӣ ва консулӣ баррасӣ намуданд.                     Вазири корҳои хориҷии Тоҷикистон масъалаҳои муҳокимашавандаро муҳим арзёбӣ намуда, таваҷҷӯҳи мусоҳибонашро ба вусъати ҳамкорӣ, хусусан барои сохтмони роҳҳо ҷалб намуд.                      Боиси зикр аст, ки ҳамаи таклифу пешниҳоди Ҳамрохон Зарифӣ ба ҳуҷҷати хотимавӣ ворид карда шуданд.                      Дар анҷоми мулоқот вазирон ҳуҷҷати хотимавӣ — Баёнияи муштараки сеюмин иҷлоси вазирони корҳои хориҷии Ҷумҳурии Тоҷикистон, Ҷумҳурии Исломии Эрон ва Ҷумҳурии Исломии Афғонистонро оид ба ҳамкории сеҷониба ба имзо расонданд.                     Пас аз ба имзо расидани Баёнияи муштарак вазирони корҳои хориҷӣ оид ба натиҷаҳои мулоқот бо хабарнигорони хориҷӣ нишасти матбуотӣ доир намуданд. Дар суханронии худ дар назди намояндагони воситаҳои ахбори омма Ҳамрохон Зарифӣ ба мазмуну мундариҷаи мулоқот ва натиҷаҳои он баҳои баланд дода, зикр кард, ки оид ба тамоми масъалаҳои баррасишуда ҳар се ҷониб андеша ва мавқеи яксон доштанд ва дар натиҷа мувофиқаи комил ба даст омад.                    Сипас вазирони корҳои хориҷии се кишвари дӯст, ҳамсоя ва ҳамзабон дар маросими ифтитоҳи чаҳорроҳаи Фирдавсӣ ва китобхонаи Фирдавсӣ, ки дар маркази шаҳри Мазори Шариф ба қарибӣ сохта шудаанд, иштирок намуда, аз девори фарҳехтагони Балх дидан карданд.                      Дар ин бора ба АМИТ «Ховар» аз вазорати корҳои хориҷии кишвар хабар доданд