ИСТИФОДАИ ТЕЛЕФОНҲОИ МОБИЛӢ МАҲДУД МЕШАВАД

                   Душанбе, 10 март.(АМИТ «Ховар», Марзия Саидова).-Бо ворид намудани илова ба лоиҳаи Қонунҳои Ҷумҳурии Тоҷикистон «Дар бораи маориф», «Дар бораи таҳсилоти олии касбӣ ва таҳсилоти касбии баъд аз муассисаи олии таълимӣ» ва «Дар бораи таҳсилоти ибтидоии касбӣ» бо худ гирифтан гаштан ва истифодаи телефонҳои мобилӣ дар тамоми мактабҳои олӣ ва муассисаҳои таълимии мамлакат новобаста аз шакли идоравиашон манъ карда мешавад. Ба лоиҳаи Қонунҳои мазкур 10 март вакилони палатаи поёнии парлумони мамлакат илова ворид карда, онҳоро қабул карданд.                   Раиси Кумита оид ба илм, маориф, фарҳанг ва сиёсати байни ҷавонони Маҷлиси намояндагон Додихудо Саймуддинов масъалаи мазкурро шарҳ дода гуфт, ки тадбири мазкур дар асоси муроҷиати чандинкаратаи Президенти мамлакат Эмомалӣ Раҳмон бо мақсади беҳтар сохтани сифати таълиму тарбия дар муассисаҳои таълимии кишвар андешида шудааст. Бояд тазаккур дод, ки қаблан аз ҷониби Вазири маорифи ҷумҳурӣ Абдуҷаббор Раҳмонов Фармон интишор гардида буд, ки тибқи он истифодаи телефонҳои мобилӣ дар муассисаҳои таълимии мамлакат манъ карда шуда буд. Мутаасифона ин амал самарае набахшид ва вақти он расидааст, ки парлумони кишвар ҷиҳати ҳалли ин проблема ба қонунҳои кишвар иловаҳо ворид сохта чораҳои қонунӣ андешид. Масъалаи истифодаи телефонҳои мобилӣ натанҳо ба паст шудани сифати таълиму тарбия оварда расонидааст балки ба саломатии насли наврас ва ҷавонон таъсири манфӣ мерасонад.                   Додихудо Саймиддинов меафзояд, ки мактаббача ва ё донишҷӯе, ки Қонунҳои мазкурро риоя намекунад, ҳатман тибқи Кодекси маъмурии кишвар ба ҷавобгарии маъмурӣ кашида шуда, аз ӯ ҷарима ситонида мешавад.