КИТОБХОНАИ МИЛЛИИ БА НОМИ А. ФИРДАВСӢ БО АДАБИЁТИ ТОЗАНАШР ҒАНӢ ГАРДОНИДА ШУД

                   Душанбе, 25 март. (АМИТ «Ховар», Лутфия Эшонқулова).- Имрўз, бо мақсади иҷрои дастуру супоришҳои Президенти мамлакат Эмомалӣ Раҳмон, ки дар мулоқот бо зиёиёни мамлакат иброз намуда буд, Вазорати фарҳанги ҶТ беш аз 2,5 ҳазор китобҳои бадеӣ, илмӣ, илмӣ-оммавиро ҳамчун тўҳфа ба Китобхонаи миллии ҶТ ба номи А. Фирдавсӣ тақдим намуд.                    Тавре ба мухбири АМИТ «Ховар» дар маркази матбуотии вазорат хабар доданд, аз ин ҳисоб 1000 нусха китобҳои гуногуни ҷамъоваришуда аз китобхонаи шахсии Вазири фарҳанг М. Асрорӣ мебошад.                    Бояд зикр намуд, ки дар байни асарҳои дорои аҳамияти таърихӣ ва тарбиявидошта, инчунин бо забонҳои гуногун адабиётҳо хеле зиёданд, ки онҳо натанҳо барои тарбияи насли наврас, балки барои баланд бардоштани ҳисси худшиносӣ, ватандўстии ҷомеа мусоидат хоҳанд намуд.                    Ташаббуси Сарвари давлат дорои моҳияти баланди башардўстона буда, барои гардиши китоб, ки сарвати бебаҳои маънавӣ аст, кўмак мерасонад.                     Бо истифода аз фурсат, кормандони Вазорати фарҳанг тамоми аҳли зиёи мамлакатро даъват менамоянд, ки ин ташаббуси наҷибро ҳамаҷониба дастгирӣ намуда, барои муккамалгардонии фонди китобхонаҳои мамлакат бо адабиёти тозанашр саҳм гузоранд.