КОНФРОНСИ ҶУМҲУРИЯВӢ БАХШИДА БА ЭҶОДИЁТИ ИМОМИ АЪЗАМ ДАР ХУҶАНД

                  Хуҷанд, 4 март (АМИТ «Ховар», Санавбар Мақсудова). — Дар шаҳри Хуҷанд дар мавзӯи «Мероси Имоми Аъзам ва фарҳанги миллӣ» конфронси ҷумҳуриявӣ баргузор гардид. Дар маросими ифтитоҳи он намояндаи Дастгоҳи иҷроияи Президенти ҷумҳурӣ Тоҷиддин Асомиддинов, раиси вилояти Суғд Қоҳир Расулзода, роҳбарони корхонаю муассисаҳо, олимону адибон, намояндагони ҳизбҳо ва ҷунбишҳо, созмонҳои ҷамъиятӣ, ходимони дин, маъмурияти шаҳру ноҳияҳои вилоят ва омӯзгорону донишҷӯёни мактабҳои олӣ ширкат варзиданд. Раиси вилояти Суғд Қоҳир Расулзода дар мавзӯи «Нақши Имоми Аъзам дар рушди фарҳанги миллӣ» маърӯза кард. Ӯ дар бораи ҳаёту фаъолияти Имоми Аъзам, мероси илмии он, нақши Имоми Аъзам дар таърихи дини ислом, хусусиятҳо, анъанаҳо ва афзалиятҳои таълимоти мазҳаби «Ҳанафия» сухан ронд.                 Дар конфронс инчунин, олимон Абдуманнон Насриддинов, Низомхон Зоҳидов ва Саиднӯъмон Саидов маърӯза карданд. Қисмати дуюми конфронс дар бахшҳои забону адабиёт ва таъриху сиёсат имрӯз дар толорҳои Донишгоҳи давлатии Хуҷанд ба номи академик Бобоҷон Ғафуров давом кард.