МАҚОЛАИ НАВИ ФИДЕЛ КАСТРО ДАР БОРАИ ПЕШРАФТИ ИҚТИСОДИЁТИ ЧИН

                 Гавана, 31 март. (АМИТ «Ховар», ТРЕНД). — Пешвои инқилоби Куба Фидел Кастро дар мақолаи нави худ бахшида ба афзоиши нуфузи Чин дар иқтисодиёти ҷаҳон менависад, ки «мавқеи ин мамлакат дар бозори ҷаҳонӣ торафт мустаҳкамтар мегардад. Ин барои мамлакатҳои ғарб ҳақиқати талх мебошад». Эътирофи нақши рӯзафзуни Чин дар иқтисодиёти ҷаҳон барои мамлакатҳои ғарб зарбаи бузурги иқтисодӣ ба шумор меравад, гуфта мешавад дар мақола. Ф.Кастро дар бораи мавқеи Чин дар муносибатҳои байналхалқии иқтисодӣ бори дуюм мақола менависад. Мақолаҳои ӯ дар воситаҳои ахбори оммавии Куба чоп шуданд.                  Дар мақолаи пештараи Ф.Кастро гуфта мешавад, ки нақши Чин дар мулоқоти сарони давлатҳои аъзои «Гурӯҳи бистгона» бо назардошти бӯҳрони ҷаҳони молиявӣ ниҳоят назаррас хоҳад буд. Ҳол он ки Иёлоти Муттаҳидаи Амрико то солҳои охир дар бозори иқтисодии ҷаҳон мавқеи асосӣ дошт. Дар мақолаи Ф.Кастро гуфта мешавад, ки Чин аз ИМА маблағи калон қарздор аст, дар баробари ин Пекин муборизаро барои устувор гардондани мавқеи худ дар бозори молиявии ҷаҳон сол то сол тақвият мебахшад. Ҷомеаи ҷаҳон ҳақ дорад, ки дар бораи проблемаҳои иқтисодии бӯҳрони молиявӣ ҳар чӣ бештар маълумот ба даст орад. Бӯҳрони мазкур айни ҳол тақрибан ҳамаи мамлакатҳои ҷаҳонро фаро гирифтааст, менависад Фидел Кастро. Тарҷумон — Қудратов А.