МАНФИАТҲОИ ШАҲРВАНДОН ПОЙМОЛ ШУДАНД

                      Душанбе,25 март. (АМИТ «Ховар», Лаззат Диловарзод).-Дар фаъолияти прокуратураи генералии ҷумҳурӣ ошкор намудани садҳо ҷиноятҳо, аз қабили сӯиcтифода аз мансаб ва вазифаҳои хизматӣ, порахӯрӣ, аз худ кардани моликияти давлатӣ, зарар овардан ба буҷет, молия ва андоз бозгӯи пешрафти корҳои соҳа мебошад.Санҷишҳои прокурорӣ дар вилояти Хатлон нишон доданд, ки қонуншиканиҳо хеле зиёданд.                     Бино ба иттилои прокурори генералӣ Бобоҷон Бобохонов, солҳои охир ягон корхонаи саноатии шаҳри Қӯрғонтеппа бо иқтидори пурра фаъолият накардааст. Корхонаҳои фаъолиятдошта ба даҳҳо қонуншиканиҳо роҳ додаанд. Ҷамъияти саҳомии шакли кушодаи «Умед-1» дар соли 2008 ба маблағи 2 млн. 244 ҳазору 333 сомонӣ маҳсулот истеҳсол намудааст, ки нисбат ба соли 2007 ба маблағи 1 млн. 507 ҳазору 332 сомонӣ камтар аст. Директори корхонаи мазкур С.Н. Ҷобиров музди меҳнати коргаронро ба маблағи 86323,66 сомонӣ пардохт накарда, онро ба суратҳисоби ширкатҳои дигар гузаронида, ҳуқуқ ва манфиатҳои 110 нафар коргарони корхонаро поймол намудааст, ки барои ин амал ҷазои сазовор гирифт.