МАШВАРАТИ ВАЗИРОНИ МОЛИЯИ МАМЛАКАТҲОИ ИДМ ДАР МАСКАВ

                  Душанбе, 31 март. (АМИТ «Ховар», Наргис Бояхмедова). — Дар пойтахти Русия — шаҳри Маскав машварати вазирони молияи мамлакатҳои аъзои ИДМ давом дорад. Дар машварат масъалаҳои марбут ба вазъияти ҳозираи иҷтимоию иқтисодии давлатҳои Иттиҳод ва тадбирҳои кам кардани таъсир ва оқибатҳои бӯҳрони ҷаҳонии молиявӣ муҳокима карда мешаванд. Иштирокчиёни машварат инчунин мавқеи мамлакатҳояшонро дар мулоқоти сарони давлатҳои аъзои «Гурӯҳи бистгона» муайян ва мувофиқа менамоянд, ки 2 апрел дар Лондон баргузор хоҳад гашт.                  Мухбири АМИТ «Ховар» хабар медиҳад, ки дар машварати мазкур вазири молияи Ҷумҳурии Тоҷикистон Сафаралӣ Наҷмиддинов иштирок дорад. Машварати вазирони молияи мамлакатҳои ИДМ бо қарори Шӯрои сарони давлатҳои Иттиҳод аз моҳи октябри соли 2008 мунтазам гузаронида мешавад. Дар он вазъияти иҷтимоию иқтисодии мамлакатҳо муҳокима карда, барои ҳалли проблемаҳои мавҷуда тадбирҳо андешида мешаванд. Тавре хабар дода шуда буд, бо супориши Шӯрои сарони ҳукуматҳои мамлакатҳои Иттиҳод барои бартараф сохтани оқибатҳои бӯҳрони молиявӣ тавсияҳо пешниҳод карда шуда буданд.                    Бояд гуфт, ки ин масъала дар байни мамлакатҳои Иттиҳод мунтазам баррасӣ карда мешавад. Дар натиҷа барои таъмини вазъияти босуботи молиявӣ тадбирҳои самарабахш андешида мешаванд. Дастгирии фаъолияти молиявии бонкҳо, додани кафолати ҳифзи маблағҳои пасандози аҳолӣ дар бонкҳо, истифодаи пулҳои миллӣ зимни хариду фурӯши мол дар байни мамлакатҳо, расондани кӯмаки молиявӣ ба корхонаҳои калонтарин ва пешгирии бекории оммавӣ аз ҷумлаи чунин тадбирҳо мебошанд.