МЕҲНАТИ ДАСТҶАМЪӢ

                   Истаравшан, 4 март. (АМИТ «Ховар», Ҳусейни Нарзулло) — 28-феврал дар ҳашари умумихалқӣ 17 537 нафар сокинони шаҳру деҳот фаъолона иштирок карданд. Дар ин рӯзи офтобию барои корҳои кишоварзӣ қулай 6 537 нафар коргарони хоҷагиҳои ҷамоавӣ, фермерӣ ва деҳқонӣ ба корҳои ободонӣ ва кабудизоркунӣ машғул гардиданд. Бояд қайд намуд, ки дар ин рӯз 8 530 бех ниҳол, аз ҷумла 7 200 бех ниҳолҳои мевадиҳанда ва 1 330 бех ороишию сояафкан, зиёда аз 11 000 бех қаламчаҳо шинонданд. Дар ин рӯзи кори дастаҷамъӣ 15,5 га боғи нав бунёд гардида 5,2 га боғу токзорҳои кӯҳна барқарор карда шудаанд, — гуфт муовини раиси шаҳр, сардори ситоди шанбегии умумихалқӣ Ҳакимҷон Бобоев.                    Меҳнаткашони шаҳру деҳот дар ин рӯз хамчунин 222 000 тонна хокрӯбаю партовҳоро бароварда ба масофаи 44 км ҷӯйбору қубурҳоро тоза карданд. Чунин ҳашарҳо дар ҳамаи шаҳру навоҳии вилояти Суғд пурсамар ташкил карда шуд.