МУБОРИЗА БА МУҚОБИЛИ ХАРИДУ ФУРӮШИ ОДАМОН ТАДБИРҲОИ ИЛОВАГИРО ТАЛАБ МЕНАМОЯД

                   Душанбе, 4 март. (АМИТ «Ховар», Наргис Бояхмедова). — Солҳои охир хариду фурӯши одамон ба соҳаи даромадноки фаъолияти ҷиноӣ табдил ёфтааст, бинобар ин мубориза ба муқобили ин зуҳуроти номатлуб низ тадбирҳо ва ҷидду ҷаҳди иловагиро талаб менамояд. Дар ин бора раиси иҷлосияи 63 — юми маҷмаи кулли СММ Мигел Деското Брокман дар ҷараёни конфронси байналхалқӣ дар Баҳрайн сухан ронд. Аз рӯи маълумоти Созмони байналхалқии меҳнат маблағи даромади солонаи одамфурӯшон ба 32 миллиард доллар мерасад.                   Қайд карда шуд, ки ҳар сол дар натиҷаи фиребу маҷбуркунӣ ё истифодаи усулҳои дигар миллионҳо одамон ҳадафи хариду фурӯш қарор мегиранд ва қисми зиёди онҳо аз вартаи асорат халос шуда наметавонанд.