МУЛОҚОТИ Ҳ. ЗАРИФӢ БО НАМОЯНДАИ МАХСУСИ ВАКОЛАТДОРИ ОЛМОН

                   Душанбе, 31 март. (АМИТ «Ховар», Темур Бандишоев). — Вазири корҳои хориҷии Ҷумҳурии Тоҷикистон Ҳамрохон Зарифӣ зимни сафари корӣ ба Маскав 27 март бо намояндаи махсуси ваколатдори Ҷумҳурии Федероли Олмон дар масъалаҳои Афғонистон ва Покистон Бернд Мютселбург мулоқот кард. Ҳ.Зарифӣ ба ҳамсӯҳбаташ барои баҳои мусбати ӯ ба фаъолияти Тоҷикистон дар ҳифзи сарҳадҳо изҳори сипос намуд. Бояд гуфт, ки намояндаи Олмон зимни суханрониаш дар конфронси махсуси бахшида ба Афғонистон ба таҷрибаи Тоҷикистон дар ҳифзи сарҳад баҳои баланд дод.                   Намояндаи махсуси ҶФО ҳамкории самарабахши Тоҷикистону Олмон ва муносибатҳои дӯстонаи деринаи ҳар ду ҷонибро зикр намуд. Вай изҳор дошт, ки мамлакаташ тайёр аст, ташаббусҳои Тоҷикистонро барои барқарор сохтани иқтисодиёти Афғонистон дастгирӣ намояд. Ҳ.Зарифӣ зикр кард, ки ҳифзи сарҳади Тоҷикистон вақтҳои охир хеле беҳтар гардидааст ва дар ин бора солҳои охир рух надодани ҳамлаҳои террористӣ дар минтақаи сарҳад шаҳодат медиҳад. Проблемаи ягонаи имрӯза қочоқи маводи нашъадор ба воситаи сарҳад мебошад, гуфт вазири корҳои хориҷии Тоҷикистон. Вай ба мусоҳибаш дар бораи барномаҳои минтақавии Тоҷикистон оиди Афғонистон маълумоти муфассал дод. Нақшаҳои сохтмони роҳу кӯпрукҳо, роҳҳои оҳан ва хатҳои интиқоли барқ аз ҳамин ҷумлаанд.Ҳ.Зарифӣ ба намояндаи Олмон барои ташхиси мустақилонаю воқеъбинонаи нақшаҳои сохтмони иншоотҳои гидроэнергетики Тоҷикистон изҳори сипос намуд.