МУЛОҚОТИ РАИСИ ВИЛОЯТ БО НАМОЯНДАГОНИ ВАО

                    Душанбе, 10 март. (АМИТ «Ховар», Бекназари Абӯбакр). — Имрӯзҳо дар тамоми қаламрави ҷумҳурӣ бахшида ба иди касбии рӯзноманигорони тоҷик — Рӯзи матбуоти тоҷик чорабиниҳои гунон доир мегарданд. Бо ин мақсад, 9 март раиси вилояти Суғд Қоҳир Расулзода бо собиқадорони матбуот, кормандони нашриёту матбааҳо ва намоянадгони расонаҳои хабарии хориҷию дохилии вилоят мулоқот намуд. Нахуст Қоҳир Расулзода кормандони воситаҳои ахбори оммаро бо иди касбиашон табрик намуда, изҳор дошт, ки дар ҳоли ҳозир мардум дар симои рӯзноманигор мададгор ва пуштупаноҳи худро мебинанд. Аз ин рӯ, бештари маврид мардум тариқи расонаҳои хабарӣ барои ислоҳи хатову камбудиҳо ба масъулин муроҷиат мекунанд.                   Аз маркази иттилоот ва таҳлили дастгоҳи раиси вилояти Суғд ба мухбири АМИТ «Ховар» иттилоъ доданд, ки дар фарҷоми ҷамъомад раиси вилояти Суғд Қоҳир Расулзода иддае аз собиқадорони матбуот ва кормандони расонаҳои хабарии давлативу мустақилро бо тӯҳфаҳои хотиравӣ ва сипосномаи мақомоти иҷроияи ҳокимияти давлатии вилоят сарфароз гардонид.                   Тантанаҳо бахшида ба иди касбии рӯзноманигорон то 11 март идома карда, дар назар аст, ки имрӯз, озмуни вилоятии рӯзноманигори ҷавон «Хомаи заррин» ҷамъбаст карда шавад.