НАҚШАИ СЕМОҲА ПЕШ АЗ МӮҲЛАТ ИҶРО ШУД

                Душанбе, 30 март. (АМИТ «Ховар», Лаззат Диловарзод).- Бино ба иттилои Вазорати энергетика ва саноати ҷумҳурӣ, дар корхонаи мошинсозии «Тоҷиктекстилмаш» ба истеҳсоли асбобҳои барқдиҳии ГЭС- ҳои хурди то 35 кВт қувваи барқ тавлидкунанда оғоз карда шудааст. Нархи чархҳо бе генератор 14-15 ҳазор сомонӣ мебошад, ки барои як маҳалла, деҳа ва ё шаҳрак аз аҳамият холӣ нест. Корхона бо дархости сокинони ноҳияҳои Варзоб, Рашт ва Ҳисор чунин чархҳоро истеҳсол ва ба ин ноҳияҳо интиқол дод.                Коршиносон ва муҳандисони корхона истеҳсоли 63 кВт-таи чунин чархҳоро барои ГЭС- ҳои хурд ба нақша гирифтаанд.                Аз рӯи истеҳсоли маҳсулот корхона аллакай нақшаи семоҳаашро пурраю барзиёд иҷро карда, барои семоҳаи дуюм маҳсулот истеҳсол мекунад.