НАҚШИ ОМӮЗГОР

                Fончӣ, 16 март. (АМИТ «Ховар», Ҳусейни Назрулло). — Бо ташаббуси шӯъбаи маорифи ноҳияи Ғончӣ дар мактаби таҳсилоти умумии рақами 51-и деҳаи Ғазантарак дар мавзӯи «Нақши муаллим дар фаъолгардонии мустақилияти хонанда ва худидоракунии талабагӣ» семинари директорони мактабҳои ноҳия доир гардид.                 Дар доираи ин семинар иштирокдорони он ба мактаб ва музейи таърихию кишваршиносии ноҳия шинос гардида, ба як қатор дарсҳои таълимию тарбиявии синфҳои аз 3 то 11-и мактаби №51 иштирок карданд. Сипас, бо чораҷӯйиҳои беруназсинфии мактаб, аз қабили машварати аъзоёни Шӯрои талабагӣ, викторинаи геохимиявии  «Асрори азалро на ту дониву на ман» ва клуби ҳозирҷавобон бо номи «Мӯъҷизаҳои табиат» баргузор гардид.               Инчунин, озмунҳои «Кани духтарон», «Тоҷи заррин» хеле дилчаспу хотирмон доир гардида, маҳфили «Мо забони англисӣ меомӯзем», ки бо роҳбарии омӯзгор М.Чӯраева созмон ёфт, мақбули иштирокдорони семинар гашт.