НАШЪАМАНДОН ДАР КӮЛОБ БА ТАШХИСИ ХУН ҶАЛБ МЕШАВАНД

                       Кӯлоб, 4 март (АМИТ «Ховар», Сулаймон Холов).- Ташкилоти ҷамъиятии «Судманд» дар Кӯлоб тибқи як барномаи нав нашъамандонро ба супоридани хун ҷалб менамояд. Роҳбари ин ташкилот Толибшоҳ Саидалиев мегӯяд, ки нашъамандон бо ихтиёри худ аз ташхиси махсуси тиббӣ намегузаранд. Бо анҷом додани корҳои фаҳмондадиҳӣ муваффақ шудаанд, то иддае аз чунин ҷавонон ба супоридани хун ризоият бидиҳанд. Бад ин тартиб ба гуфтаи ӯ, таи ду моҳи фаъолият аз миёни ҷавонони ташхисшуда ду нафаре пайдо шуд, ки мубтало ба бемории ВиЧ шудаанд.                      -«Ба хотири хубтар ба роҳ мондани кор мо барои нахустин бор дар ин самт ба низоми нави корӣ гузаштем, ки ҳатман нафари нашъаманд, ному ҷои истиқоматаш сабт мешавад, ҳарчанд, ки ин ба касе фош карда намешавад»-афзуд Толибшоҳ Саидалиев.                      Феълан, ба қавли масъулин дар минтақаи Кӯлоб беш аз 170 сироятёфтагони ВиЧ сабти ном шудаанд.