ПАРЛУМОНИ ӮЗБЕКИСТОН АҲДНОМА ДАР БОРАИ САРҲАДИ ДАВЛАТИРО ТАСДИҚ КАРД

                    Душанбе, 13 март.(АМИТ «Ховар», Марзия Саидова)- 12 март дар Тошканд палатаи поёнии парлумони Ӯзбекистон -Олӣ Маҷлиси Аҳдномаи байни Ҷумҳурии Тоҷикистон ва Ҷумҳурии Ӯзбекистон дар бораи сарҳади давлатии Тоҷикистону Ӯзбекистонро тасдиқ кард. Дар ин хусус аз Сафорати Ҷумҳурии Ӯзбекистон дар Ҷумҳурии Тоҷикистон ба АМИТ «Ховар» иттилоъ доданд.                   Тасдиқи Аҳдномаи мазкур метавонад ба рушди тақвияти ҳамкории минбаъдаи ду кишвари дӯсту бародар-Тоҷикистону Ӯзбекистон, ки дорои робитаҳои неку ҳасанаи фарҳангию таърихианд, нақши муассир гузорад.  Аҳднома 7 сол муқаддам, аниқтараш 5 октябри соли 2002 дар шаҳри Душанбе ба имзо расида буд. Он асосҳои ҳуқуқии гузариши хати сарҳади давлатии ду кишвари дӯсту ҳамҷавор- Тоҷикистону Ӯзбекистонро муайян месозад.  Онро 25 феврали соли 2009 палатаи поёнии парлумони Тоҷикистон- Маҷлиси намояндагон тасдиқ намуда буд.Аҳднома аз 9 модда ва се замима иборат буда, муқаддимаи он мақсад ва мароми ба имзо расонидани Аҳдномаро инъикос намудааст.                   Тасдиқи Аҳдномаи мазкур аз ҷониби парлумонҳои ду кишвари ҳамҷавор- Тоҷикистон ва Ӯзбекистон дар ҳалли масъалаҳои марзиву ҳудудии ҳар ду давлат нақши муассир мегузорад. Зеро ин санад дар асоси низом ва қонунҳои байналмилалӣ таҳия шуда, манфиатҳои миллию соҳибихтиёрии ҳам Тоҷикистон ва ҳам Ӯзбекистонро ҳимоя менамояд.