ПИЁДАГАРДОН ДАР ХАТАР

                 Душанбе, 17 март. (АМИТ «Ховар», Жасмин Назарова). — Имрӯзҳо бо ташаббуси кормандони Идораи бозрасии давлатии автомобилӣ бо мақсади пешгирии фалокатҳои нақлиётӣ ва кам кардани зарари онҳо, хусусан осеб дидани бачагон тадбирҳои судбахш андешида мешаванд. Дар доираи ин тадбирҳо ба талабагон қоидаҳои ҳаракати роҳ омӯхта мешавад.                  Тавре ба АМИТ «Ховар» корманди дафтари матбуоти БДА шаҳри Душанбе майор Мирзохон Саидов иттилоъ дод, дар давоми 2 моҳ талабагон шоҳиди 23 ҳодисаи роҳу нақлиёт шуданд. Бар асари ин ҳодисаҳо 3 нафар ҳалок ва 20 нафари дигар ҷароҳатҳои гуногуни ҷисмонӣ бардошта, дар беморхонаҳо бистарӣ гаштаанд.                  Аз ҷумла, ронандаи мошини тамғаи «Volkswagen» рақами давлатиаш ЕЕ 84 05 РТ 01 таҳти идораи Бобоев Умед, истиқоматкунандаи ноҳияи Шаҳринав, ҷамоати Боғистон бе ҳуҷҷати ронандагӣ ва дар ҳолати мастӣ ҳангоми ҳаракат бо хиёбони И. Сомонӣ аз тарафи кӯчаи Б. Ғафуров ба тарафи кӯчаи Баҳоваддинов дар роҳи пиёдагард хонандаи синфи 1 мактаби миёнаи №89 Раҳмия Нуроваро пахш карда аз ҷои ҳодиса ғайб задааст. Ҷабрдида аз зарари сахти ҷисмонӣ дар ҷои ҳодиса ба ҳалокат расид. Аз тарафи кормандони БДА шаҳри Душанбе корҳои фаврӣ-ҷустуҷӯӣ бурда ҷинояткор дастгир карда шуд. Тафтишоти ин воқеа идома дорад.