ПРЕЗИДЕНТИ ФАРОНСА НОМАИ ТАҲДИДОМЕЗ ГИРИФТ

              Париж, 4 март (АМИТ «Ховар» — Синхуа ). — Тибқи хабарҳои аз Фаронса расида, президенти мамлакат Николя Саркози ва баъзе сиёсатмадорони маъруф чанд рӯз пеш номаҳои таҳдидомез гирифтанд. Шахсони номаълум дар номаҳои фиристодаашон таҳдид кардаанд, ки ба ҷони президент ва сиёсатмадорони дигар сӯиқасд хоҳанд кард. Политсия ба тафтиши ин воқеа шурӯъ кард.              Қобили зикр аст, ки дар дохили конвертҳо тир гузошта шуда буд. Чунин номаҳои таҳдидомез ба унвони вазири корҳои дохилӣ, вазири адлия, вазири фарҳанг ва сарвазири собиқ низ фиристода шуданд. Бояд гуфт, ки матни ҳамаи номаҳо ба ҳамдигар мувофиқат мекунад. Муаллифи номаълум ҳизби ҳоким ва ҳизбҳои тарафдори онро ба кӯшиши қабули қонуне гунаҳкор менамояд, ки озодии одамонро маҳдуд месозад.               Ёдовар мешавем, ки соли 2006 ду шахси номаълум ба унвони президенти собиқи Фаронса Жак Ширак чунин номаҳои таҳдидомез фиристода буданд. Политсия ҷинояткоронро ёфт, ҳоло онҳо мӯҳлати ҷазоро дар ҳабсхона мегузаронанд.