РОҲИ ОҲАНИ ДУШАНБЕ — ҚӮРҒОНТЕППА ТОҶИКИСТОНРО БО АФҒОНИ

                 Душанбе, 19 март. (АМИТ «Ховар», Темур Бандишоев). — Сармуҳандиси вазорати нақлиёт ва алоқаи ҷумҳурӣ Юрий Юлдошев ба АМИТ «Ховар» хабар дод, ки барои сохтмони роҳи оҳани Душанбе — Қӯрғонтеппа 129 миллион доллари ИМА сарф карда мешавад. Ҳадафи асосии сохтмони роҳ бо маркази вилояти Хатлон пайваст намудани пойтахти мамлакат мебошад.                Дар шароити имрӯза аз Душанбе бо роҳи оҳан ба шаҳри Қӯрғонтеппа танҳо ба воситаи қаламрави Ӯзбекистон рафтан мумкин аст, ки дарозии он бештар аз 460 километр мебошад. Дарозии роҳи нави оҳан ҳамагӣ 125 километр хоҳад буд.                Ю.Юлдошев афзуд, ки роҳи мазкур имкон медиҳад дар оянда аз Қӯрғонтеппа ба воситаи Колхозобод то Панҷи поён ва Афғонистон роҳи оҳан сохта шавад.                 Тавре хабар дода шуда буд, дар маросими оғози сохтмони роҳ Президенти ҷумҳурӣ Эмомалӣ Раҳмон ширкат варзид. Вай изҳор намуд, ки хароҷоти сохтмони роҳ дар давоми даҳ сол бароварда мешавад. Сарвари давлат сокинони маҳаллиро даъват намуд, ки ҳар порчаи заминро оқилонаю самарабахш истифода бурда, истеҳсоли маҳсулоти кишоварзиро зиёд кунанд ва бо ҳамин таъсири манфии бӯҳрони молиявиро то ҳадди имкон кам намоянд.                 Зимни мулоқоти сардори давлат Эмомалӣ Раҳмон бо сокинон яке аз соҳибкорони маҳаллӣ Сафарбек Назаров ваъда дод, ки дар сохтмони Маркази барқу гармидиҳии иқтидораш 50 мегаватт саҳм мегузорад. Вай изҳор намуд, ки дар назди маркази барқу гармидиҳӣ корхонаҳои истеҳсоли бензини синтетикӣ ва сӯзишвории дизелӣ хоҳад сохт. Барои сохтмони маркази барқу гармидиҳӣ ва корхонаҳои дигар 65 миллион евро сарф мешавад.  С.Назаров изҳор намуд, ки корхонаҳои мазкурро дар давоми ду сол сохта, дар арафаи 20 — солагии истиқлолияти ҷумҳурӣ ба истифода хоҳад дод.