САФАРИ Н. БОРДЮЖА БА АРМАНИСТОН

                 Маскав, 3 март (АМИТ «Ховар», Ҳалима Хушқадамова). — Муншии умумии Созмони аҳдномаи амнияти дастаҷамъӣ Николай Бордюжа дирӯз барои боздиди корӣ ба Ҷумҳурии Арманистон рафт. Вай ба роҳбарони вазорату идораҳои дахлдори ин мамлакат, ки роҳбарии мақомоти оинномавии СААД ба зиммаи онҳо гузошта шудааст, дар бораи натиҷаҳои ташкили заминаи меъёрию ҳуқуқии қувваҳои низомии дастаҷамъии вокуниши таъҷилӣ маълумоти зарурӣ хоҳад дод. Н.Бордюжа, аз ҷумла, бо президенти Ҷумҳурии Арманистон Серж Саргисян мулоқот хоҳад кард.                 Н.Бордюжа қабл аз сафар ба Ереван зимни сӯҳбат бо хабарнигорон изҳор намуд, ки котибот, ситоди муттаҳидаи созмон ва коршиносони давлатҳои аъзои он лоиҳаи ҳуҷҷатҳоеро омода сохтанд, ки мақому фаъолият, тартиботи ҳуқуқӣ ва шартҳои истифодаи Қувваҳои дастаҷамъии низомии вокуниши таъҷилиро ба низом медароранд. Акнун ин ҳуҷҷатҳо дар байни давлатҳои аъзои созмон мувофиқа карда мешаванд.                Николай Бордюжа ҳамчунин бо вазирони корҳои хориҷӣ, мудофиа ва котиби шӯрои амнияти миллии Арманистон мулоқот карда, баъдан дар тадбирҳои марбут ба солгарди ташкили Маркази байналхалқии дастгирии иттилоотии СААД дар Арманистон ширкат хоҳад варзид.