ТАҶЛИЛИ ИДИ МАТБУОТ ДАР ВИЛОЯТИ СУҒД

                  Душанбе, 12 март. (АМИТ «Ховар», Бекназари Абӯбакр). — 11 март дар «Маркази ҷавонон»-и шаҳри Хуҷанд иди касбии рўзноманигорони тоҷик — Рўзи матбуоти тоҷик бо ширкати рӯзноманигорон ва намояндагони матбаа ва нашриётҳои вилоят таҷлил гардид. Аҳли қаламро бо иди касбӣ муовини раиси вилояти Суғд Ваҳҳоб Набиев аз номи мақомоти иҷроияи ҳокимияти давлатии вилояти Суғд табрик намуда, ба гурӯҳи рӯзноманигорон тўҳфаҳои мақомоти иҷроияи ҳокимияти давлатии вилоят — нишони сарсинагии «Аълочии матбуоти Тоҷикистон» ва мукофотҳои Созмони вилоятии Иттифоқи журналистонро тақдим кард.                  Роҳбари маркази иттилоот ва таҳлили дастгоҳи раиси вилояти Суғд Илҳом Ҷамолов ба мухбири АМИТ «Ховар» иттилоъ дод, ки ҳамзамон, худи ҳамин рӯз ғолибони озмуни вилоятии рӯзноманигори ҷавон «Хомаи заррин» муайян шуд ва дави умумӣ, ки дар доираи таҷлили Рўзи матбуот пешбинӣ шуда буданд, доир гардид.                  Ёдрас мешавем, ки 9 март раиси вилояти Суғд Қоҳир Расулзода бо собиқадорони матбуот, кормандони нашриёту матбааҳо ва намояндагони расонаҳои хабарии хориҷию дохилии вилоят мулоқот карда, ба 20 нафар собиқадорони матбуот ба маблағи 100 сомонӣ тӯҳфаи пулии мақомоти иҷроияи ҳокимияти давлатии вилоятро тақдим намуда буд.