ТАЪМИНИ ВОҚЕИЯТ ВА ТАЪСИРБАХШИИ ОН БЕШТАР МЕГАРДАД

                  Истаравшан, 4 март. (АМИТ «Ховар», Ҳусейни Нарзулло) — Фармони Президенти Ҷумҳурии Тоҷикистон « Дар бораи вокуниши шахсони мансабдор ба маводҳои танқидӣ ва таҳлилии воситаҳои ахбори омма» — ро ноҳияи Ғончӣ бисёр хуш пазируфт,- иброз дошт сармуҳаррири рӯзномаи «Овози Ғончӣ» Усмонҷон Икромов.                  Тасвиби чунин Фармони Сарвари Давлат агар аз як тараф ба мустаҳкам намудани интизоми иҷроия ва баланд бардоштани нақши воситаҳои ахбори омма дар ҳаёти ҷамъиятӣ — сиёсӣ ва иҷтимоӣ — иқтисодии кишвар мусоидат намояд, аз тарафи дигар, ин иқдоми муҳим мо рӯзноманигорон водор менамояд, ки дар иҷрои вазифаи хеш масъулияти куллиро эҳсос кунем. Ҳамчунин, таъмини воқеъият ва муассирии маводҳои танқидию таҳлилиро вазифаи асосӣ шуморем. Баробари интишори ин санади муҳим бояд гуфт, ки аллакай бархурди роҳбарону кормандони масъули корхонаю муассисаҳо ва ташкилоту хоҷагиҳо ба воситаҳои ахбори омма ва маводҳои нашршуда ба тарафи мусбат тағйир ёфта истодааст ва ин фармон ҳатман самараҳои дилхоҳро ба бор меоварад, — гуфт У. Икромов.