ТАВАҶҶӮҲИ КИШВАРҲОИ АРАБӢ БА КИТОБИ САРВАРИ ДАВЛАТИ ТОҶИКИ

                Душанбе, 5-ми март. (АМИТ «Ховар», Наргис Бойаҳмадова). — Ҳафтаномаи арабии Россия «Анба Моску» (Московские новости) як саҳифа аз шумораи навбатии худро зери рубрикаи «Россия ва давлатҳои ҳамсоя» ба мавзӯӣ тарҷумаи арабии китоби Президенти Тоҷикистон Эмомалӣ Раҳмон «Тоҷикон дар оинаи Таърих», ки моҳи ноябри соли 2008 дар Қоҳира аз ҷониби «Дору-л-фикр-л-арабӣ» нашр гардид, бахшидааст. Дар ин бора ба АМИТ «Ховар» аз сафорати Тоҷикистон дар Мисри Араб хабар доданд.                Дар мақола ҷумлаҳои «Дини исломӣ ва фарҳанги исломӣ муштаракоти халқи мо ҳастанд», «Бо вуҷуди қатли ом ва ҳамлаҳои таҷовузгарон фарҳанги тоҷикон устувор боқӣ монд» ва «Тоҷикон ба тамаддуни умумибашарӣ Абуллайси Самарқандӣ, Абӯҳанифа, Ибни Сино, Ҷалолидини Румӣ ва дигаронро додаанд» ҳамчун чакидаҳои ин асар бо ҳарфҳои калон сарлавҳагузорӣ шудаанд.                Рӯзномаи мисрии «ал-Масо» (шомгоҳӣ) низ дар шумораи рӯзи 27 феврали соли равон дар шарҳу тавзеҳи тарҷумаи арабии китоби Президенти Тоҷикистон мақолае бо номи «Тоҷикон дар оинаи таърих….даъват ба наздикшавӣ бо ислом»-ро чоп кардааст, ки он ба қалами рӯзноманигори мисрӣ М.И. ал-Баҳровӣ таалуқ дорад.                Ёдовар мешавем, ки китобро бо забони арабӣ олима ва тарҷумони шинохтаи Миср Макорим ал-Ғамрӣ тарҷума кардааст. Айни замон тарҷумаи ҷилдҳои дуюм ва сеюми китоби мазкур ба забони арабӣ идома дорад ва моҳҳои наздик ба чоп хоҳад расид.