З. ЗУБАЙДОВ БО А. ЗАРДОРӢ МУНОСИБАТҲОИ ТОҶИКИСТОНУ ПОКИСТОНРО БАРРАСӢ НАМУД

                   Душанбе, 18 март. (АМИТ «Ховар», Наргис Бояхмедова). — Сафири Фавқулодда ва Мухтори Ҷумҳурии Тоҷикистон дар Ҷумҳурии Исломии Покистон Зубайдулло Зубайдов Эътимодномаи худро ба Президенти Ҷумҳурии Исломии Покистон Асиф Алӣ Зардарӣ супорид.                     Дар оғози сӯҳбат Президент Асиф Алӣ Зардарӣ аз мулоқоти пурсамари худ дар ҷараёни Саммити сарони давлатҳои СҲИ (ЭКО) дар Теҳрон бо Президенти Ҷумҳурии Тоҷикистон Эмомалӣ Раҳмон ёдовар шуда, сипас пешниҳоди Сафири Тоҷикистон дар Покистонро, ки аз масъалаҳои муҳими равобити ҳарду кишвар иборатанд, мавриди таваҷӯҳ қарор дод. Аз ҷумла, масъалаҳои гузаронидани ҷаласаи навбатии Комиссияи муштарак дар шаҳри Исломобод дар мӯҳлатҳои наздиктарин, ҷудо кардани қитъаи замин барои сохтмони Сафорати Тоҷикистон дар пойтахти Покистон, бо назардошти он, ки ҷониби Тоҷикистон низ омода аст, барои сохтмони Сафорати Покистон дар дар Душанбе замин ҷудо кунад, ривоҷу равнақ додани муносибатҳои дуҷониба, таъқиди аҳамияти бузурги татбиқи лоиҳаҳои гироэнергетикӣ барои ҳар ду ҷониб, кушодани хатти парвози мустақим байни пойтахтҳои ҳарду кишвар, омодагиҳо барои амалӣ намудани сафари А. Зардарӣ ба Тоҷикистон, баровардани Ҷумҳурии Тоҷикистон аз рӯйхати сиёҳи Покистон марбут ба гирифтани раводид, ки он ба 18 давлат шомил мебошад, мавриди баррасӣ қарор гирифтанд.                    Дар ин бора ба АМИТ «Ховар» аз департаменти иттилооти Вазорати корҳои хориҷӣ хабар доданд.