ҚАБУЛИ ЭЪТИМОДНОМАИ САФИРИ ВАТИКАН

                Душанбе, 22 апрел. (АМИТ «Ховар», Темур Бандишоев). — Тавре хабар дода шуда буд, Президенти Ҷумҳурии Тоҷикистон Эмомалӣ Раҳмон субҳи имрӯз эътимодномаи сафири фавқулодда ва Мухтори Ватикан дар Ҷумҳурии Тоҷикистон Мигел Мауру Буендияро қабул намуд.                М.М.Буендия баъди анҷоми мулоқоташ бо Президент бо намояндагони воситаҳои ахбори оммавии ҷумҳурӣ мухтасар сӯҳбат кард. Вай аз ҷумла, зикр намуд, ҳамроҳи Сарвари давлат масъалаҳоеро муҳокима кардааст, ки ба рушди муносибатҳои дуҷониба кӯмаки калон расонда метавонанд.                Аз ҷумла, масъалаҳои марбут ба муколамаи динҳои насронӣ ва ислом, инчунин, масъалаҳои марбут ба муколамаи фарҳангҳо баррасӣ шуданд. Сафири Ватикан изҳор намуд, ки Тоҷикистон фарҳанги бою қадима, таърихи тӯлонии динӣ ва адабиёту ҳунари беҳамто дорад ва метавонад бо кӯмаки Ватикан онҳоро дастраси мамлакатҳои дигари ҷаҳон гардонад. Ватикан кӯшиш ба харҷ хоҳад дод, ки мавқеи Тоҷикистон дар арсаи ҷаҳон мустаҳкамтар гардад. Мо мавқеи Тоҷикистонро дар ҷамъомадҳою мулоқотҳои гуногуни байналхалқӣ дастгирӣ менамоем, гуфт сафири Ватикан.                  Қайд карда шуд, ки Ватикан бештар аз 30 сол боз бо Донишгоҳи Алаҳзор ва мактабҳои дигари олии мамлакатҳои мусулмон ҳамаҷониба ҳамкорӣ мекунад. Аминам, ки Тоҷикистон ҳам дар муколамаи динҳо ва фарҳангҳо саҳми арзанда гузошта метавонад. Ин ба афзун гардидани обрӯю эътибори Тоҷикистон дар арсаи байналхалқӣ мусоидат хоҳад кард, гуфт дар хотима сафир.                                                                          Тарҷумон — Қудратов А.