ҚАРЗИ КАЛОНИ ХАЗИНАИ БАЙНАЛХАЛҚИИ АСЪОР БА ТОҶИКИСТОН

               Душанбе, 23 апрел. (АМИТ «Ховар», Наргис Бояхмедова). — Шӯрои иҷроияи Хазинаи байналхалқии асъор 21 апрел қарори додани қарзро ба Тоҷикистон ба маблағи 116 миллион доллари ИМА маъқул донист. Ин қарз ба Тоҷикистон ба мӯҳлати се сол дода мешавад. Дар навбати аввал аз маблағи қарз 38,7 миллион доллари он пардохта хоҳад шуд.                Аз дафтари матбуоти Бонки миллии ҷумҳурӣ ба АМИТ «Ховар» хабар доданд, ки маблағи қарзи мазкур асосан барои пур кардани захираи асъори Бонки миллӣ истифода карда мешавад. Раиси Бонки миллӣ Шариф Раҳимзода изҳор намуд, ки Хазинаи байналхалқии асъор ба созмонҳои дигари байналхалқии молиявӣ пешниҳод кардааст, ки ба Тоҷикистон барои бартараф сохтани оқибатҳои бӯҳрони молиявӣ 200 миллион доллари ИМА қарз диҳанд.