ҲАМКОРИИ ИҚТИСОДИИ ТОҶИКИСТОНУ ИТАЛИЯ ВУСЪАТ МЕЁБАД

               Душанбе, 2 апрел. (АМИТ «Ховар», Пайрав Назаров). — Имрӯз дар ҷараёни мулоқоти вазири корҳои хориҷии Ҷумҳурии Тоҷикистон Ҳамрохон Зарифӣ бо котиби давлатии вазорати корҳои дохилии Ҷумҳурии Италия Сенатор Алфредо Мантика масъалаҳои равнақу ривоҷи муносибатҳо ва ҳамкории дуҷонибаи ҳар ду мамлакат муҳокима шуданд.               Алфредо Мантика баъди мулоқоташ бо Ҳамрохон Зарифӣ зимни сӯҳбат бо хабарнигорон изҳор намуд, ки ҳар ду ҷониб ба тарафдории ривоҷ додани муносибатҳои тиҷоратию иқтисодӣ ақида изҳор намуданд. Зимни сӯҳбат инчунин проблемаҳои Афғонистон баррасӣ шуданд.               А.Мантика изҳор намуд, ки Италия ба гузаронидани конфронси махсус бахшида ба Афғонистон тайёрӣ мебинад. Дар он ҳамаи мамлакатҳои ҳамсояи Афғонистон, аз ҷумла, Тоҷикистон иштирок хоҳанд кард. Ҳаминаш муҳим аст, ки дар конфронс намояндагони Эрон ва ИМА бевосита мулоқот хоҳанд кард, гуфт меҳмон.               Мухбири АМИТ «Ховар» хабар медиҳад, ки дар фарҷоми мулоқот Созишномаи ҳамкории ҳукуматҳои Тоҷикистону Италия дар соҳаҳои саноатию иқтисодӣ ва техникӣ ва протоколи ҳамкории вазоратҳои корҳои хориҷии ҳар ду мамлакат имзо шуданд.