ҶИНОЯТКОРӢ КАМ МЕШАВАД

                    Хуҷанд, 22 апрел. (АМИТ «Ховар», Санавбар Мақсудова). — Аз дафтари матбуоти прокуратураи вилояти Суғд ба АМИТ «Ховар» хабар доданд, ки дар давоми се моҳи аввали соли 2009 дар вилоят 822 ҷиноят ба қайд гирифта шуд. Ин нисбат ба ҳамин давраи соли гузашта 37 ҷиноят кам аст. То имрӯз 87,4 фоизи тамоми ҷиноятҳои содиршуда фош карда шуданд.                    Дар ин давра содир гардидани ҷиноятҳои вазнин аз қабили куштор, сӯиқасд ба ҷони дигарон, ғоратгарӣ, аз худ кардани моликияти дигарон ва ғайра хеле кам шуд. Дар баробари ин теъдоди баъзе ҷиноятҳо, аз ҷумла, дидаю дониста маҷрӯҳ кардани одамон, расондани зарари ҷисмонӣ, таҷовуз ба номус, ғайриқонунӣ нигоҳ доштану истифода бурдани аслиҳаи оташфишон ва қаллобӣ зиёд гардид. Кормандони мақомоти муҳофизи қонун дар ин давра аз аҳолӣ 124 мил аслиҳаи оташфишонро мусодира карда, 75 кӯшиши хариду фурӯши ғайриқонунии маводи нашъадорро барбод доданд.