А. КАБУТОВ: «МО ҶАВОНОНРО БО ҶОИ КОР ТАЪМИН МЕНАМОЕМ»

                   Душанбе, 13 апрел. (АМИТ «Ховар», Ибодат Давлатова). — Корхонаи воҳиди давлатии «Биржаи меҳнатии ҷавонон» давоми се моҳи соли ҷорӣ мунтазам ярмаркаҳои ҷойҳои кори холӣ баргузор намуд, ки дар натиҷа нафарони зиёде бо ҷойҳои кори доимӣ ва муваққатӣ таъмин гардиданд. Паҳлӯҳои мухталифи бо ҷои кор таъмин намудани аҳолӣ ва ба ин васила паст кардани сатҳи бекорӣ дар ҷумҳурӣ ва аҳамияти ин ярмаркаҳоро директори Корхонаи воҳиди давлатии «Биржаи меҳнатии ҷавонон» Абдурозиқ Кабутов дар сӯҳбат бо мухбири АМИТ «Ховар» шарҳ дода, зикр намуд, ки 13 январ ва 20 феврал Биржа дар ҳамкорӣ бо Сарраёсати ҳифзи иҷтимоӣ ва шуғли аҳолии шаҳри Душанбе, 20 март дар ҳамкорӣ бо Хадамоти муҳоҷирати Вазорати корҳои дохила ярмаркаҳои ҷойҳои кори холиро баргузор намуд.                   Ӯ афзуд, ки Корхонаи воҳиди давлатии «Биржаи меҳнатии ҷавонон» аслан барои бо кор таъмин кардани ҷавонон машғул аст. Дар ярмарка 1720 ҷойҳои кори холӣ дар дохили ҷумҳурӣ пешниҳод шуд, дар он 22 корхонаю муассисаҳо иштирок намуданд. Зиёда аз 3,5 ҳазор корҷӯён дар ин ярмарка иштирок намуданд. Мо аз ин 136 нафарро ба корҳои доимӣ ба дохили ҷумҳурӣ равон кардем ва 32 нафарро ба омӯзиш дар дохили ҷумҳурӣ дар назди маркази фарҳангии «Ориёно» барои омӯзиш ҷалб намудем. Дар соли 2009 мо ба нақша гирифтем, ки дар асоси шартномаҳои тарафайн бо кордиҳандагони Федератсияи Русия дар вилояти Волгоград 170 ҷой, бо хоҷагии аграрии савхози Карповск дар вилояти Москва, бо хоҷагии аграрии Бунятинои вилояти Москва як шартномаи дуҷониба ба имзо расондем, ки имрӯз ҷавонон барои сафарбар кардан тайёранд. Мо то имрӯз 13 нафарро ба вилояти Волгоград равон намудем ва аз 20 май 65 нафари дигар ба ФР ба вилояти Москва, ба шаҳри Дмитриев ба корҳои агарарӣ равон карда мешаванд. Дар онҷо музди маоши миёна аз 12 то 18 ҳазор рубли русӣ ва дар вилояти Волгоград аз 12 то 14 ҳазор рубли русӣ пешбинӣ шудааст. Ин ҷо боз як ҷизи дигарро бояд қайд намоям, ки дар асоси қарордод роҳкиро аз ҳисоби кордиҳандагони ФР пардохт карда мешавад. Ва ин як имтиёзи хеле хуб аст, инчунин ба расмият даровардани ҳуҷҷатҳо ва ҷои истиқомат аз ҳисоби кордиҳандаи ФР пардохт карда мешавад.