«АГРОИНВЕСТБОНК» ДАР КӮЛОБ ҲАҶМИ ҚАРЗҲОИ БОВАРИНОКРО МЕАФЗОЯД

               Душанбе, 23 апрел. (АМИТ «Ховар», Бекназари Абӯбакр). — Дар минтақаи Кӯлоб аз оғози соли ҷорӣ ҶСК «Агроинвестбонк» дар посух ба пешниҳоди сарвари давлат оид ба содда кардани низоми қарздиҳӣ ба шаҳрвандон 78 ҳазор сомонӣ қарз ҷудо кард.               Аз бонки мазкур ба АМИТ «Ховар» иттилоъ доданд, гурӯҳи иборат аз 6-12 нафар метавонад ҷиҳати роҳандозӣ ва рушди як намуди фаъолияте муттаҳид гардида, аз бонк қарз гирад. Шарти асосии пешниҳоди ин намуди қарз якдигарро хуб донистани аъзои гурӯҳ ва кафил будани онҳо ба якдигар барои қарз аст.               Таҳти кафолати гурӯҳӣ бонк маротибаи аввал ба маблағи то 1 000 сомонӣ қарз дода мешавад. Соли гузашта чунин тарзи пешниҳоди қарз дар 16 гурӯҳ — иборат аз 178 нафар дар ноҳияҳои Ҳамадонӣ ва Кӯлоб санҷида шуда, бобати саривақт баргардонидани қарзҳо ҳеҷ мушкилоте пеш наомадааст.