БАЙТОРҲО СОҲИБИ ДУЧАРХА ШУДАНД

                 Бадахшон, 3 апрел. (АМИТ «Ховар», Лутфишо Додо).- Барномаи озуқа ва кишоварзии Созмони Миллали Муттаҳид ба хотири сари вақт анҷом додани маъракаи эмкунӣ ва табобати ҳайвонот байторони вилоятро бо дучарха таъмин намуд. Тавре масъули Бахши вилоятии ин барнома Гулнамо Хуҷамёрова иттилоъ дод, коршиносони соҳаи байторӣ, ки дар деҳоти дурдаст зиндагӣ доранд, бо сабаби нарасидани воситаи нақлиёт наметавонанд сари вақт чорвои сокинони деҳотро мавриди ташхис қарор дода, бемориҳои сироятиро аниқ муайян намоянд. Маҳз ҳамин вазъиятро ба назар гирифта, барномаи озуқа ва кишоварзии Созмони Миллали Муттаҳид байторонро бо дучурхаҳо таъмин намуд,- изҳор дошт Гулнамо Хуҷамёрова. Гулнамо Хуҷамёрова беш аз 4 сол боз ба Раёсати назорати байтории вилоят ҳамкорӣ дорад. Ин барнома мутахассисони риштаи байториро натанҳо бо доруворӣ таъмин менамояд, балки барояшон либосҳои махсуси кориро муайян менамояд. Онҳо ҳамчунин барои такмили касб ба омӯзиш фаро гирифта шуда, бо навигариҳои солҳои охири ин соҳа ошно мешаванд. Бо гуфти ӯ соли равон дар ҳар як ҷамоати вилоят дорухонаҳои байторӣ ифтитоҳ меёбанд.