БАРГУЗОРИИ КОНФЕРЕНСИЯИ ҶУМҲУРИЯВИИ ТОЛИБИЛМОН ДАР ДУШАНБЕ

                Душанбе, 28 апрел. (АМИТ «Ховар», Фарангис Раҳимова). — Конференсияи ҷумҳуриявии «Иштироки толибилмон дар идоракунии донишгоҳ» имрӯз, 28 апрел дар Душанбе баргузор мегардад. Чорабинии мазкур бо ташаббус ва сарпарастии Вазорати маорифи ҶТ дар ҳамкорӣ бо Донишгоҳи давлатии тиҷорати Тоҷикистон ва Барномаи «Мусоидат ба таҳсилоти олӣ»-и Институти «Ҷомеаи Кушода» -и Тоҷикистон барпо мегардад. Дар ин бора ба АМИТ «Ховар» аз Институти «Ҷомеаи Кушода» — Тоҷикистон хабар доданд.                 Конференсияи «Иштироки донишҷўён дар идоракунии донишгоҳ» ба толибилмони мактабҳои олии Тоҷикистон имкон медиҳад, ки малакаи худро дар кори илмию тадқиқотӣ дар соҳаи идоракунии соҳаи маориф инкишоф диҳанд.                  Дар конференсия 20 маърўзаи донишҷўён аз вилоятҳои Суғду Хатлон, ВМКБ ва шаҳри Душанбе, ки дар озмуни моҳи марти соли 2009 гузарондаи Барномаи «Мусоидат ба таҳсилоти олӣ»-и Институти «Ҷомеаи Кушода» -и Тоҷикистон ғолиб омадаанд, шунида мешаванд.                  Ҳайати ҳакамони мустақил, ки аз намояндагони макотиби олӣ иборат мебошад, маърўзаҳои муҳаққиқони ҷавонро арзёбӣ намуда, 3 маърўзаи беҳтаринро бо мукофотҳои махсус — компютер сарфароз мегардонанд.