БМИМТ БАРНОМАИ БОНКИ РУШДИ ОЛМОНРО АМАЛӢ МЕСОЗАД

                   Душанбе, 17 апрел. (АМИТ «Ховар», Пайрав Назаров). — Дар доираи ҳамкориҳои Тоҷикистону Олмон Бунёди Миллии Иҷтимоии Маблағгузории Тоҷикистон барномаи Бонки рушди Олмон «Фондҳо барои мусоидати рушди маълумоти асосӣ ва инфраструктураи ҷамоавӣ»-ро татбиқ менамояд. Дар доираи ин барнома 30 лоиҳаи хурд дар 14 ноҳияи қисмати ғарбии вилояти Хатлон, алалхусус, ноҳияҳои А.Ҷомӣ, Бохтар, Ҷиликул, Қубодиён, Хуросон, Ҷ.Румӣ, Қумсангир, Носири Хусрав, Панҷ, Шаҳритус, Вахш, Ёвон ва шаҳрҳои Нораку Сарбанд иҷро карда мешавад.                  Дар БМИМТ ба мухбири АМИТ «Ховар» иттилоъ доданд, ки мақсади ин барнома дастрас намудани табақаҳои камбизоати аҳолӣ ба инфраструктураи иҷтимоии босифат, ба хусус, иншоотҳои соҳаи маориф, тандурустӣ, инчунин соҳаи хизматрасонии коммуналӣ ва ғайра мебошад.                  Барои ба ин мақсад расидан 50%-и маблағҳо ба соҳаи маориф равона карда шудааст. Буҷаи умумии барнома 6,72 млн. евроро ташкил медиҳад, ки аз ин миқдор 5,4 млн. евро саҳми ҷониби Олмон буда, 1,02 млн. евро саҳми Ҳукумати Тоҷикистон ва 0,3 млн. евро саҳми худи аҳолӣ мебошад. Мӯҳлати иҷроиши барномаи мазкур 36 моҳ аст.