БОЙГОНӢ 78 СОЛА ШУД

                  Душанбе, 3 апрел. (АМИТ «Ховар», Жасмин Назарова). — 3 апрел аз таъсисёбии бойгонии давлатии Ҷумҳурии Тоҷикистон 78 — сол пур шуд. Тавре дар сӯҳбат ба хабарнигори АМИТ «Ховар» мудири бахши бойгонии мақомоти иҷроияи ҳокимияти давлатии вилояти Суғд Мавлонҷон Дадабоев гуфт, алҳол дар бойгонии вилояти Суғд 340 ҳазор парванда аз солҳои 1914-и асри 20 то имрӯз ҳифз карда мешавад.                  М. Дадабоев мегӯяд, ки бойгонии вилояти Суғд соли 1925 таъсис дода шуда, бахшҳои он дар шаҳру ноҳияҳои Истаравшан, Панҷакент ва Конибодом фаъолият менамоянд. Бойгонии вилояти Суғд соли 2007 соҳиби бинои нав гардид, ки он аз 40 утоқи корӣ ду маҳфузгоҳи калон барои ғунҷоиши 250 ҳазор ҳуҷҷат иборат аст. Инчунин, бинои нав дорои шароити мусоид ва таҷҳизоти замонавӣ барои ҳифз ва нигоҳдошти санадҳои таърихӣ мебошад. Дар бойгонии вилояти Суғд 40 корманд фаъолият дорад. Ба фаъолияти электронӣ гузаштани бойгонӣ ва пайваст ба шабакаи байналмиллалии Интернет аз дурнамои фаъолияти идора ба шумор меравад.