БОЗДИДИ О. ОҚИЛОВ АЗ МАҲАЛЛИ ОФАТИ ТАБИӢ ДАР ХУРОСОН

                 Душанбе, 25 апрел. (АМИТ «Ховар», Наргис Бойаҳмадова). — Бо супориши Президенти Ҷумҳурии Тоҷикистон Эмомалӣ Раҳмон гурўҳи кории ҳукуматӣ бо роҳбарии Сарвазири мамлакат Оқил Оқилов аз маҳалли офати табиии дар ноҳияи Хуросони вилояти Хатлон, боздид ба амал овард.                  Зимни боздид муаяйн шуд, ки бар асари офати табиӣ зиёда аз 70 манзили истиқоматӣ, аз ҷумла 22 хона ба пуррагӣ ва боқимонда қисман зарар дидаанд.                  Ёдовар мешавем, ки бар асари боришоти зиёди шаби 21-ум ба 22-юми апрели соли равон лағжиши хоку лой аз мавзеи баланди наздикии деҳа ба вуқўъ пайваста, ба хоҷагии халқи сокинони деҳаи 18-уми партсъезди боло ва поён хисорот расонид. Гурўҳи корӣ дар маҳалли ҳодиса нахуст бо зарардидагон сўҳбатҳо ороста, аз вазъи зиндагии муваққатии онҳо дар хаймаҳо ва таъминоти аҳолӣ бо маводи аввалияи рўзгор ошноӣ пайдо намуданд.                 Сипас, бо иштироки Сарвазири мамлакат дар ҷойи ҳодиса ситоди корӣ доир гардид. Оқил Оқилов бобати рафъи бетаъхири оқибатҳои офати табиӣ ба масъулини мақомоти маҳаллӣ, роҳбарони вазорату идораҳои дахлдор дастуру супоришҳо дода, онҳоро ҷиҳати иҷрои босифати корҳои барқарорсозӣ муваззаф намуд.