БОЗОМӮЗИИ ТАБИБОНИ ОИЛАВӢ

                Душанбе. 10 апрел. (АМИТ «Ховар», Ибодат Давлатова). — 23 нафар духтурон ва 65 нафар ҳамшираҳои шавқати муассисаҳои кӯмаки аввалияи тиббӣ-санитарии вилояти Суғду Хатлон курси шашмоҳаи омӯзиши тибби оилавиро ба охир расонданд.                Тавре ҳамоҳангсоз бо ҷомеа ва васоити ахбори омма Лайли Ахмадова иттилоъ дод, Маркази Ҷумҳуриявии татбиқи Лоиҳаи оид ба тандурустии заминавӣ ва ҷамоавӣ, бозомӯзии духтурон ва ҳамшираҳои шафқати муассисаҳои кӯмаки аввалияи тиббӣ-санитарии ноҳияи Сарбанд, Шӯрообод, Қабодиён, Норак, Ашт ва Спитаменро дар марказҳои клиникию омӯзишии тибби оилавии вилоятҳои Суғду Хатлон амалӣ мекунад. Лоиҳа омӯзиши 176 духтур ва 496 ҳамшираи тиббиро мутобиқи нақшаи бозомӯзӣ дар назар дорад. Аз аввали фаолияти Лоиҳа аллакай 183 духтур ва 453 ҳамшираи тибби оилавӣ бозомӯзонида шудааст, ки аз нақшаи дар пешгузоштаи лоиҳа зиёдтар мебошад.                Ба ғайр аз ин, ба ҳар як духтур ва ҳамшираи омӯзондашуда, дар муассисаҳои кӯмаки аввалияи тиббӣ-санитарӣ борхалтаи тиббӣ супорида шудааст, ки он аз фонендоскоп, отоскоп (асбоби санҷиши гӯш), офталмоскоп (асбоби санҷиши чашм), танометр, глюкометр (асбоби санҷиши қанд) дар хун ва дигар асбобҳои зарурии ташхисӣ иборат мебошад. Дар давраи бозомӯзии духтурон ва ҳамшираҳои тибби оилавӣ, Лоиҳа хароҷоти роҳ, манзил ва хӯрокаи кормандони тиббии бозомӯзи ноҳияҳои таҷрибавиро ба ӯҳда дошта, бо маводи конселаярӣ ва адабиёти тиббӣ таъмин мекунад. Аллакай дар ноҳияҳои таҷрибавии Суғду Хатлон духтурони тибби оилавӣ хизмати худро ба аҳолӣ мерасонанд.