БОЗОРҲОИ ВОСЕЪ БАСТА ШУДАНД
Кӯлоб, 7 апрел. (АМИТ «Ховар», Сулаймон Холов). — Раиси ноҳияи Восеъ Султон Валиев зимни як ҷаласа гуфт, ки дар ҳудуди ноҳия фаъолияти ду бозорро муваққатан манъ намудааст. С. Валиев мегӯяд, ки аз сабаби ба талаботи санитарӣ-гигиенӣ ҷавобгӯ набудан бозорҳои деҳаи Гулистон ва деҳаи Қурбоншаҳид баста шуданд. Инчунин, ба роҳбарони бозорҳо супориш дода шуд, ки камбудиҳои ҷойдоштаро ислоҳ кунанд. Дар ин сурат ба онҳо иҷозати дубора фаъолият намудан дода мешавад — иброз дошт раиси ноҳия. Бояд гуфт, ки чунин камбудиҳо дар бозори марказии ноҳия низ мушоҳида мешавад, ки ба гуфтаи Раис онҳо алакай ислоҳ шудаанд. Таҳрири Жасмин Назарова