БУҶЕТИ ДАВЛАТИИ СОЛИ 2009 КАМ КАРДА ШУД

                  Душанбе, 30 апреля.(АМИТ «Ховар», Марзия Саидова).-Дар асоси ворид намудани тағйиру иловаҳо ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2009» буҷети мамлакат барои соли равон ба маблағи 459 миллион сомонӣ кам карда шуд.                  Ин масъаларо дар ҷаласаи навбатии иҷлосияи 5-уми Маҷлиси намояндагони Маҷлиси Олии ҷумҳурӣ вазири молияи мамлакат Сафаралӣ Наҷмиддинов шарҳ дода гуфт, ки ҳадаф аз коҳиш додани буҷети давлатӣ ин пеш аз ҳама шиддатёбии бӯҳрони молиявӣ аст, ки он ба кишвари мо низ таъсири худро расонида истодааст.                  Маблағҳои ихтисор карда, асосан ба соҳаи сохтмон, иншоотҳое, ки сохтмонашон чандон муҳим нест, таъмиру таҷдиди биноҳои вазорату идораҳо, муассисаҳо ва сафарҳои хизматӣ ҷудо гардида буданд, дахл дорад. Он ба маоши кормандони бахшҳои гуногуни кишвар марбут ва алоқамандӣ надорад.                  Бояд тазаккур дод, ки буҷети давлатии Ҷумҳурии Тоҷикистон барои соли 2009 беш аз 4 миллиард сомониро ташкил медиҳад, ки қисмати бештари он барои рушди соҳаи маорифи мамлакат нигаронида шудааст.