ДАР «ХОҶАМӮЪМИН» РОВ МЕКОРАНД

             Восеъ, 9 апрел, (АМИТ Ховар, Сулаймон Холов).-Идораи ҳифзи муҳити зисти ноҳияи Восеъ тасмим гирифтааст, ки дар заминҳои доманакӯҳи ноҳия тухми ров корад. Сармутахассиси идораи ҳифзи муҳити зисти ноҳия Умаралӣ Шарипов гуфт, ки ҳоло барои ин 60 кило тухмӣ ҷудо шудааст. Ин тухмиро корхонаи ҷангали «Сино» ҷамъоварӣ намудааст. Дар болои кӯҳи намаки Хоҷамӯъмин беш аз 40 гектар ров мавҷуд аст, аммо солҳои охир қисми зиёди онро бархе аз сокинони ноҳия решакан намудаанд. Ба хотири дубора эҳё намудани ин гиёҳи шифобахш тухмии вайро зиёд хоҳем намуд. Дарахтони писта низ дар фасли сармо дар болои кӯҳ бурида шудаанд. Дар ин маврид барои беҳтар сохтани ҳифзи муҳити зист таи 1 соли охир идораи экологияи ноҳия 45 нафарро ба маблағи 1300 сомонӣ ҷарима баст. Масоҳати умумии ҷангалзори болои кӯҳ ба қавли масъулин беш аз 1128 гектарро ташкил медиҳад- гуфт Умаралӣ Шарипов.