ДАР РӮЗИ ПОЙТАХТ 30 000 МЕТРИ МУРАББАЪ МАНЗИЛ БА ИСТИФОДА ДОДА ШУД

               Душанбе, 18 апрел.(АМИТ «Ховар», Марзия Саидова).-18 апрел дар Рӯзи пойтахт дар Душанбе 8 иншооти ҷашнӣ ва наздики 30 ҳазор метри мураббаъ манзил супорида шуд.                Назар ба иттилои котиби матбуотии раиси шаҳри Душанбе Шавкат Саидов, дар кӯчаҳои Валаматзода ва Ҳофизи Шерозии пойтахт 6 бинои 9-ошёнаи истиқоматӣ мавриди истифода қарор дода, шуданд, ки шаҳодати раванди бунёдкорию созандагӣ дар пойтахт аст. Инчунин, як қатор Марказҳои савдо, таваққуфгоҳҳо, марказҳои техникӣ мавриди баҳрабардорӣ қарор гирифтанд.                Ҳамзамон, дар Рӯзи пойтахт бо мусоид омадани боду ҳаво сокинон ва кормандони идораю муассисаҳои гуногуни пойтахт ба ҳашари умумишаҳрӣ баромада, дар тозаю обод гардонидани маҳали зист, коргоҳ, кӯчаю хиёбонҳои шаҳр ва соҳилҳои дарёи Душанбе саҳми муносиб гузоштанд.                Шавкат Саидов афзуд, ки бо мақсади хотирмон гузаронидани рӯзи пойтахт дар асоси нақша-чорабиниҳои таҳрезӣ намудани раиси шаҳр Маҳмадсаид Убайдуллоев дар Боғҳои фарҳангу фароғатии устод Айнӣ, «Дӯстии халқҳо», «Кӯли комсомол» ва майдони «800-солагии Москва» сайру гашти идонаи шаҳрвандон аз соати 13 то 17 ташкил карда мешавад.               Баъд аз зуҳр дар «Маркази равобити пойтахт» бо иштироки раиси шаҳр дар робита ба ҷашн ҷамъомади тантанавӣ баргузор мегардад. Дар он як қатор озмунҳои шаҳрӣ ва марафони дав ҷамъбаст гардида, ба ғолибон тӯҳфаҳои хотиравӣ ва ифтихорномаҳо супорида мешавад.