ДАР ТОҶИКИСТОН 56 ЛОИҲА ТАТБИҚ МЕШАВАД

                Душанбе, 27 апрел. (АМИТ «Ховар», Бекназари Абӯбакр). — «Сабади лоиҳаҳои инвеститсионии амалкунандаи Ҳукумати Ҷумҳурии Тоҷикистон ба 1 апрели соли ҷорӣ 56 лоиҳаро ба маблағи умумии 6,4 миллиард сомонӣ ташкил медиҳад, ки аз ин миқдор маблағҳои қарзӣ 74 фоиз, маблағҳои грантӣ 15 фоиз ва маблағҳои буҷавӣ 11 фоизро ташкил медиҳанд», — гуфт зимни нишасти матбуотӣ 27 апрел, раиси Кумитаи давлатии сармоягузорӣ ва идораи амволи далатии Ҷумҳурии Тоҷикистон Фаррух Ҳамралиев.                  Ӯ афзуд, ки дар давоми семоҳаи аввали соли равон азхудкунии маблағҳо 298 миллион сомониро ташкил дода, татбиқи лоиҳаҳо дар соҳаҳои мухталифи иқтисодиёти мамлакат ҷараён меёбанд.                  Мавриди зикр аст, ки ба ҳолати имрӯза ҷалби умумии сармояи мустақими хориҷӣ ба 3 миллиард сомонӣ баробар шуд, ки ин нишондиҳанда нисбат ба ҳамин давраи соли гузашта 10 фоиз зиёд мебошад.                  Дар фарҷом Ф. Ҳамралиев ба саволҳои хабарнигорон посухҳои мушаххас дода, зикр намуд, ки бо мақсади ҷалби ҳарчи бештари сармояи мустақими хориҷи ба иқтисоди мамлакат диски инвеститсиони Тоҷикистон аз сари нав таҳлил гардида, 15 лоиҳаи инвеститсионии нав ба он ворид карда шуд, ки ин бевосита ба ҷалби сармояи мустақим мусоидат мекунад.