ДАР ТОҶИКИСТОН ЧАНД ХАБАРНИГОРИ ХОРИҶӢ ФАЪОЛИЯТ ДОРАД?

                  Душанбе, 30 апрел.(АМИТ «Ховар», Марзия Саидова).-«Алҳол дар Ҷумҳурии Тоҷикистон 24 намояндагии Васоити ахбори оммаи хориҷӣ ба қайд гирифта шудаанд, ки дар онҳо ҳудуди 100 хабарнигор фаъолият менамояд», гуфт дар маросими расмии ифтитоҳи намояндагии хабаргузории Ҷумҳурии Исломии Эрон -«Форс» дар Ҷумҳурии Тоҷикистон сардори департаменти иттилооти Вазорати корҳои хориҷии ҷумҳурӣ Давлаталӣ Назриев.                  Намояндаи масъули идораи сиёсати хориҷии Тоҷикистон зикр кард, ки хабаргузории «Форс» -4 -умин васоити ахбори оммаи Эрон аст, ки дар Тоҷикистон намояндагии худро кушод. То ин муддат намояндагии Хабаргузории расмии Эрон «ИРНА», Садо ва Симои Ҷумҳурии Исломии Эрон бунгоҳҳои худро дар Тоҷикистон ифтитоҳ намуда буданд.                  Ба андешаи Давлаталӣ Назриев ифтитоҳи намояндагии ВАО-и хориҷӣ, аз ҷумла, хабаргузории «Форс» дар ҳифзи манфиатҳои Ҷумҳурии Тоҷикистон ва рушди фазои иттилоотии кишварҳои минтақа ва ҷаҳон нақши муассир хоҳад гузошт.