ФАЪОЛИЯТИ ҲОКИМИЯТИ СУДӢ ДАР СЕМОҲАИ АВВАЛ

                  Душанбе, 16 апрел. (АМИТ «Ховар», Анварбек Сиддиқов).- « Дар семоҳи соли ҷорӣ Суди Олии ҷумҳурӣ ягон парвандаи ҷиноӣ оид ба хариду фурӯши одамон мавриди баррасӣ қарор надодааст»,- қайд кард раиси Суди Олии Ҷумҳурии Тоҷикистон Нусратулло Абдуллоев дар нишасти матбуотие, ки 16 апрел дар Душанбе шуда гузашт.                  Инчунин қайд карда шуд, ки дар семоҳаи мазкур дар коллегияҳои Суди Олӣ 82 парвандаҳои ҷиноӣ нисбат ба 102 ашхос ба тариқи кассатсионӣ мавриди баррасӣ қарор гирифта, аз онҳо 58 қарорҳои судӣ нисбати 68 ашхос бетағйир мононда шуда, 8 ҳукм нисбати 11 нафар тағйир, 16 қарорҳои судӣ нисбати 23 ашхос бекор карда шуданд.                 Дар коллегияи судӣ оид ба парвандаҳои гражданӣ бошад, ба тариқи кассатсионӣ ва назоратӣ 107 парвандаҳои гражданӣ баррасӣ гардиданд, ки нисбати соли 2008- 26 парванда зиёд мебошад.                 Ҳамчунин дар давраи ҳисоботӣ, дар марҳилаҳои гуногуни судӣ дар маҷмӯъ 207 парвандаҳои гражданию ҷиноӣ мавриди баррасӣ қарор гирифта, вобаста ба ҳар кадоме аз онҳо қарорҳои дахлдори қонунӣ ва асоснок қабул гардиданд.