ФАЪОЛИЯТИ КОРПОРАТСИЯИ БАЙНАЛХАЛҚИИ МОЛИЯВӢ ДАР ҶТ БА ОХИР РАСИД

              Душанбе, 29 апрел. (АМИТ «Ховар», Фарангис Раҳимова). — Корпоратсияи байналхалқии молиявӣ фаъолияти худро дар Тоҷикистон дар бобати вусъат додани усули истифодаи лизинг (қарз ё иҷораи дарозмуддат) 30 апрел ба анҷом мерасонад. Фаъолияти корпоратсияи мазкурро минбаъд Ассосиатсияи бонкҳои Тоҷикистон ва Ассосиатсияи муассисаҳои маблағгузории хурди мамлакат давом медиҳанд.             Корпоратсия ҳафтаи гузашта натиҷаҳои фаъолияти сесолаи худро дар Тоҷикистон ҷамъбаст намуд. Вай бо кӯмаки Ҳукумати Швейтсария ба муассисаҳои молиявии маҳаллӣ, ки дар барномаҳои истифодаи лизинг ширкат доштанд, ба маблағи 32,4 миллион доллари ИМА кӯмак расонда, барои ҷалби 7 миллион доллари ИМА маблағи иловагӣ мусоидат намуд. Корпоратсия дар давоми солҳои 2005 — 2008 ба Тоҷикистон аз хориҷи кишвар 22,8 миллион доллари ИМА — ро ҷалб намуд.            Мухбири АМИТ «Ховар» зикр мекунад, ки лизинг манбаи муҳими таъминоти молиявии тиҷорат буда, дар пешрафти фаъолияти корхонаю муассисаҳои маҳаллӣ ва муҳайё намудани ҷойҳои нави кор нақши муҳим мебозад.