ФИЛМИ «ШАЙХ КАМОЛ» РӮИ НАВОР МЕОЯД

                 Душанбе, 16 апрел.(АМИТ «Ховар», Марзия Саидова).-Коргардони шинохтаи эронӣ Исмоили Барорӣ ният дорад, ки дар бораи шоири машҳури қарни 13-и тоҷик Камолиддин ибни Масъуд Хуҷандӣ (1318 — 1391) филмеро таҳти унвони «Шайх Камол» ба навор бардорад. Ӯ тасмим гирифтааст, ки дар филми мазкур саргузашти шоири шинохтаю ширинкаломи тоҷик Хоҷа Камоли Хуҷандӣ аз таваллуд то марг ва сафарҳои ӯ аз Хуҷанд ба Макка ва аз онҷо то Табрез рӯи навор биёрад.                 Исмоили Барорӣ мегӯяд, ки филми мазкур дар зарфи ду сол ба наворгирифта шуда, саҳнаҳои он дар Тоҷикистон, Эрон ва Арабистони Саудӣ бо иштироки ҳунармандони тоҷику эронӣ ва араб наворбардорӣ карда мешавад. Мавсуф афзуд, ки филми «Шайх Камол» бо забонҳои тоҷикӣ ва англисӣ ба маблағи қариб 1 миллион доллар сохта мешавад.                 Ба гуфтаи муҳаққиқи тоҷик Шоҳмансури Шоҳмирзо, дар сурати ба наворгирифтани филми «Шайх Камол», он аз ҷониби тамошобинон хуб истиқбол гирифта шуда, форсизабонон маҳбубияти хосае пайдо хоҳад кард.                  Бояд тазаккур дод, ки Шайх Камоли Хуҷандӣ, ки дар адабиёти классикии тоҷику форс бо тахаллуси «булбули шуридаи Хуҷанд» машҳур аст, дар шаҳри бостонии Хуҷанд ба дунё омада, дар қарни 13 ҳангоми истилои муғулҳо тарки ватан намуда, баъди ғарибиҳо ба шаҳри Табрез меравад. Дар Табрез то охири умр зиндагӣ намуда, дар ҳамон ҷо аз олам гузаштааст. Алҳол мақбараи ӯ дар шаҳри Табрез буда, зиёратгоҳи аҳли илму адаби ҷаҳон аст.