«ФОРС» ДАР ДУШАНБЕ ЛАНГАР ПАРТОФТ

                 Душанбе, 30 апрел.(АМИТ «Ховар», Марзия Саидова).- Хабаргузории Ҷумҳурии Исломии Эрон «Форс» 30 апрел ба таври расмӣ намояндагии худро дар Душанбе- пойтахти Ҷумҳурии Тоҷикистон ифтитоҳ кард.                 Ба ин муносибат дар Душанбе бо иштироки роҳбарону намояндагони ВАО-и Тоҷикистон ҷамъомад баргузор шуд. Сафири фавқулодда ва мухтори Ҷумҳурии Исломии Эрон дар Ҷумҳурии Тоҷикистон Алиасғари Шеърдӯст ифтитоҳи намояндагии хабаргузории «Форс»-ро дар Душанбе рушди муносибатҳои мутақобилан судманди ду кишвари бародар — Тоҷикистону                   Эрон арзёбӣ кард.                 Ба андешаи мудири кулли хабаргузории «Форс» Ҳамидризо Муқаддамфар ифтитоҳи бунгоҳи хабарии «Форс» оғози пайванд ва тавсеаи ҳамкорӣ бо хабаргузориҳои иттилоотии Тоҷикистон ва васеъ намудани фаъолияти иттилоотии «Форс» дар кишварҳои Осиёи Марказӣ ва ҳавзаи уқёнуси Ҳинд мебошад. Муқаддамфар афзуд, ки ҷиҳати баланд бардоштани малакаи касбии кормандони ВАО- хусусан бахши хабарӣ, ният дорем, ки дар шаҳри Душанбе мактаби хабарнигориро таъсис диҳем.                   Сардори раёсати иттилооти Вазорати корҳои хориҷии Ҷумҳурии Тоҷикистон Давлаталӣ Назриев изҳор дошт, ки мо дар мавриди ифтитоҳи намояндагии хабаргузории «Форс»-и Эрон дар Душанбе назари нек дорем, зеро ифтитоҳи бунгоҳҳои хабарии нмояндагони ВАО-и кишварҳои хориҷӣ дар мавриди рушди фазои иттилоттии на танҳо Тоҷикистон, балки кишварҳои минтақа ва ҷаҳон саҳми босазо мегузоранд.